25、好心隐瞒 ...
-
隔日朝早，CID伙计来同文强录口供，学礼见家人探过孩子之后亦都到了妇产科病房，文强有人陪住，自己遂返了趟骨科病房。昨晚半夜偷走，成早溜溜护士就已经夺命连环call自己好几次了，差啲吵醒文强。
骨科病房
“刘医生，我嘅伤冇乜事吧？”循例查完房，学礼问站在一旁执着夹板正写着什么的男医生。
“冇事，恢复得唔差，俞sir你放心。”男医生抬起头朝他笑笑。
“咁我可唔可以出院啊？”学礼复又问。
“啊？你宜家想出院啊？”男医生闻言愣了愣，又环顾四周皱眉问，“你太太呢，佢今日冇嚟探你嘅？”
“佢喺妇产科病房，佢琴晚生咗bb，所以我先赶住出院。医生放心，我会按时返嚟复查，都会小心只脚，俾我出院应该冇问题吧？”学礼同医生解释了句，复又承诺道。
“咁啊？你等阵，我查完房再过来好唔好？”医生想了想，将夹板插回床尾，道。
“好，多谢刘医生！”学礼忙应承，目送医生护士出了病房。
执过病房内的日用品，换完衫，学礼坐在病床边等着医生返嚟。他不时翻看手机里昨晚和今早新影的bb相，小小的个子细细的五官，仲睇唔出似边个，这就是他和文强的孩子。抱他在怀里的那一刻，软绵绵轻飘飘的，匆忙之中，他已成为了父亲，从今以后，膊头上的担子更重了。
“师兄，我同冰冰录好口供了，你嗰边点嘛？”
“好，咁我打俾伯娘同佢讲，byebye。”
“俞sir……”
学礼拎着行李袋返文强病房，就见昨晚同自己录口供的CID伙计在病房门口讲电话。见他途经，她嗌了自己一声。
“係，madam，你哋录好口供咗？Case有冇乜新进展？”学礼停下脚步同她点了点头，问道。
“暂时仲冇，我哋仲揾紧目击证人。你放心，上头都好重视单case，我哋会抓紧嘅。”披着长发的中年女警一双大眼望着他期待的眼神，抿唇摇了摇头，跟住除低夹在毛衣上的警员证，“咁我哋返差馆先，如果有乜进展，或者madam So惗返起其他嘢，麻烦通知我哋。”
“好，唔该嗮！”学礼依言点了点头。
学礼推开病房门，就见到母亲在给文强喂食：“Mummy，阿强！”
“学礼，你返嚟了。”吴爱慈见新抱停下吞咽的动作，随她视线望了眼，嗌了声身着便装的儿子。
“係啊，mummy。我办咗出院手续，daddy同家姐呢？”放低行李袋在一旁柜面上，学礼也在床边坐下，将拐杖靠于床尾，一手搭在文强的被子上。
“你daddy去睇bb，佢话佢喺呢度唔係多方便。学恩同Micheal返咗公司。”吴爱慈答了学礼一句，又举了举勺子催了催文强，“阿强，食多啲了，宜家最紧要係补好身子。”
“Mummy，戥我嚟了，你唞下。”学礼忙探身接过母亲手中的碗和勺子，着母亲去休息。
“咁……我都过去睇一睇bb，你好好睇住阿强。”吴爱慈起身拎了手袋，又拍拍儿子肩膀。
“係，mummy byebye！”新任父母同她挥手道别，目送她出了病房。
“阿礼……”被学礼喂了几口汤，文强忽又嗌了他一句。
“嗯？”学礼持着勺子望着她探究的眼神，柔声问道，“係咪个汤唔好味啊？我知，mummy话咗你宜家唔食得太多盐，所以个味係淡咗啲，你忍一忍了，乖。”
“唔係，唔係个汤……医生俾你出院呐？”文强细细端详眼前人的神态，试图发现啲蛛丝马迹。
“梗係俾了，做乜唔俾喈？”学礼好笑地回了句，放低勺子摸了摸她的脸。
“喔，冇嘢。”文强抿了抿唇，复又一脸期待道，“係了，bb宜家点嘛？我好想去睇佢。”
“你宜家点睇得啊……”学礼望着她身上的管子和仪器，为难地细声嘟嚷了句，见她撅了撅嘴，忙安抚她道，“等听日医生俾你落床了，我陪你去睇好唔好？放心了，bb好啲啲嘅，头先家姐唔係俾咗佢录低嘅video你睇，佢食奶都咁叻喇，根本唔输啲足月嘅bb，你唔使担心喔~”
闻言，文强蹙了蹙眉，忽得又红了眼眶：“都係我冇保护好bb，先令到佢提早出生，又令到佢住保温箱……”
“傻了，你都唔想嘅啊，你自己都受了伤，你都好坚强撑到有人嚟救你哋，仲可以背出我嘅电话，唔係嘅话，我可能到宜家都唔知你哋出咗事。”学礼忙放低汤碗于床头柜上，自己坐到文强身侧，将她揽入怀中，下颚抵着她的头，轻轻安抚她后背和后脑，叹了口气跟住道，“再讲，真嘅要怪，都係我唔啱，係我做嘢冇小心，整亲咗自己入到医院，先令你呢排咁辛苦，先令到你同bb出意外。唔係嘅话，有我和你同进同出，点会有人埋得你身，对得你不利。你已经做到好好，係一个100分嘅妈咪，我唔许你怪责自己，都冇人会怪责你。冇乱惗嘢了，乖。”
“阿礼……唔係，唔係你……係我唔好，都係我唔好……”文强靠于学礼怀中，听着他体贴地安慰开解自己，心内更是五味杂陈。既不确定学礼究竟知否他自己的状况，亦或是扮无事减轻她的心理负担，又挂住出生至今尚未见面的儿子，忐忑又忧心，由得泪水默默淌出浸湿他衣襟。
“莫喊了，你宜家喊好伤眼嘅。”看文强和孩子出事，学礼心里亦不好受，可这一刻他必须撑住。听她带着鼻音的呢喃自责，学礼微微使力将她从自己怀中拉离，用长着厚茧的指腹帮她轻轻拭泪，挑了挑眉道，“你又话要返operation team嘅，仲喊落去咁伤到眼点算，嗯？”
“我好惊……”望着他深情恳切的眼眸，文强缓缓停下抽泣，吸了吸鼻子，复又将头倚靠于他的胸膛，右臂搂上他的坚实后背。
“莫惊，我讲咗，我会好好睇实你哋嘅，从宜家开始，我会好好守住你，唔会再俾人有机会伤害你。”学礼小心避开她左半身的点滴管和仪器接线，揽着她，郑重承诺道。
作者有话说
第25章 好心隐瞒
