《六度接觸》阿咩★

3、第三集

　　序幕（第一幕的片段）

　　時：晚上
　　地：炳記火鍋
　　人：蓉蓉，叉燒飽，阿星，炳記，珠女，陳太

　　蓉：正所謂「吃得辣中辣，方為人上人」……

　　叉：蓉蓉，係「吃得苦中苦，方為人上人」呀！

　　蓉：Shut Up！我哋分檯坐啦！Spicy嘅呢邊，清湯嘅嗰邊。

　　星：炳記嘅麻辣火鍋，My Favourite！

　　叉：（V.O.）我知錯喇！蓉蓉喺英國長大，如果我尊重佢唔熟悉中文，包容佢亂拋書包，又點會俾嗰個阿星乘虛而入……

　　呢個錯綜複雜嘅故事，就係屬於我、蓉蓉、阿星、同埋其他街坊，由一個麻辣火鍋引起嘅懸疑故事──《六度接觸》……

　　（主題音樂）

　　第一場

　　時：傍晚
　　地：炳記火鍋
　　人：蓉蓉，叉燒飽，阿星，炳記，珠女，陳太、陳生、司機、叉燒爸

　　炳：（十分興奮）今晚好多謝大家，出席我，炳記嘅火鍋大會，一齊同我，炳記最愛惜嘅侄女，蓉蓉洗麈！今日咁高興，我哋一齊乾杯！

　　叉、蓉、星、陳太、陳生、司、叉爸：（一起舉杯）乾杯！

　　（碰杯聲）

　　蓉（歉意）：司機叔叔，I am ready sorry，我敬你一杯！

　　司（笑）：我都話咗我冇兜路啦！好彩，妳兜兜轉轉，終於都嚟到炳記。

　　蓉（歉意）：「不聽老人言，吃虧在眼前！」I have learnt my lesson。

　　炳：（大笑）哈哈哈！蓉蓉，妳都要敬阿星一杯啊！如果唔係有佢，妳蕩失路唔知蕩到去邊度啊！

　　蓉（感謝）：星爺，thank you very much！

　　星（尷尬）：唔好叫我「星爺」啦！叫我「星仔」得喇！

　　叉：（爭功）喂！蓉蓉，我有份幫妳拉行李啊！

　　蓉：請問係邊個幫你卒咗半個鐘頭藥油呢？

　　星（對叉）我都敬包大俠一杯，有機會我哋再切磋切磋！

　　叉：（苦笑）冇問題！等我睇多幾套港產片，學多幾招，唔會再輸俾你！

　　叉爸：好！打得好！呢個忤逆仔，係時候要受下教訓！

　　叉：（叫苦）爹，你竟然幫外人，都唔幫自己個仔！

　　叉爸：你成日睇病唔收錢，一樣係幫外人，都唔幫自己老豆！

　　陳生：老闆，少爺仔呢啲係「醫者父母心」。

　　炳：老包，你應該老懷安慰，尊重同包容叉燒包濟世為懷嘅偉大夢想，我哋為叉燒包乾杯！

　　叉、蓉、星、陳太、陳生、司、叉爸：（一起舉杯）乾杯！

　　珠女：媽媽，我又要乾杯！

　　陳太：（不標準的廣東話）妳係細路女，唔可以乾杯……

　　珠女：點解細路女就唔可以乾杯？

　　陳太：（不標準的廣東話）媽媽說唔可以乾杯，妳就唔可以乾杯！

　　珠女：（投訴）我要乾杯！我都要乾杯！我雖然係細路女，我都有我嘅人權同自由！

　　陳生：（笑）老婆，珠女雖然仲細，佢都有自己嘅思想，我哋做父母嘅，都要尊重仔女，聆聽仔女嘅聲音啊！

　　陳太：（不滿）你成日不在家，不要說珠女嘅聲音，就連我嘅聲音，你又有幾多時間聆聽？

　　陳生：（笑）老婆，我知道妳好辛苦，所以我頭先同老闆攞咗一日假，今個星期六，我、妳、同埋珠女，一家三口，一齊去主題公園！

　　珠女：（興奮）好嘢！

　　陳生：（笑）但係妳要做晒功課，先至可以去玩啊！

　　陳太：（幸福）算你啦！不枉我由四川嫁過來，跟你一起捱苦……

　　炳：好！實在令人太感動喇！我已經準備咗炳記火鍋嘅鎮店之寶！大家一路烚，一路傾！

　　（腳步聲，炳行入廚房）

　　星：正啊！

　　蓉：你都鍾意食麻辣火鍋？

　　星：我簡直係無辣不歡！

　　蓉：（對陳）陳太，妳係四川人，麻辣火鍋，一定係妳嘅favourite！

　　陳：（不明白）飛…花…桃…？

　　珠：媽，姐姐同妳講英文，favourite，即係「妳的至愛」。

　　陳：（耍手擰頭）（普通話）不成！不成！（不標準的廣東話）我唔食辣的……

　　星：四川人竟然唔食辣？

　　叉：有咩咁奇怪呢？呢個係多元社會，就算你係印度人，都唔係餐餐咖喱啦！

　　星：包大俠，我唔係印度人，我係祖籍巴基斯坦嘅香港人啊！

　　叉：差唔多啦！

　　星：差好多啊！

　　叉：差幾多先！

　　星：多到拍十套《喜馬拉亞星》都講唔完啊！

　　（腳步聲，炳記攞火鍋出黎）

　　炳：（聲音由遠而近）登登登登！炳記火鍋，鎮店之寶，超級無敵終極麻辣火鍋！

　　星：哇！炳記！你啲麻辣火鍋真勁好勁！我聞陣味就已經知道啦！

　　炳：（自豪）梗係！我放咗一斤指天椒落去喎！加上我為咗今日特登加咗秘製辣椒醬同辣椒油，再煮佢三五七日，梗係入味！我特登為阿蓉度身訂造架！

　　叉：你地試得咁開心，等我都試一試先…（叉喝一口湯，辣到飛起）嘩！

　　蓉：你真係冇用，到依家都食唔到辣，正所謂「吃得辣中辣，方為人上人」。

　　叉：（辣到飛起）蓉蓉，係「吃得苦中苦，方為人上人」呀！

　　蓉：Shut Up！我哋分檯坐！Spicy嘅呢邊，清湯嘅嗰邊。

　　星：炳記嘅麻辣火鍋，My Favourite！配豆腐同蔬菜，簡直係人生最大享受啊！

　　蓉：剩食豆腐同蔬菜，咁dry？食串鵝腸先啦！

　　星：唔好意思，我食齋…

　　蓉：（驚訝）Oh My God！你竟然食齋！？

　　叉：既然阿星哥咁浪費，呢一串咁肥美嘅鵝腸，就放落清湯呢邊啦！

　　蓉：Shut Up！鵝腸配麻辣火鍋，呢個係定律，This is the rule！

　　珠：姐姐，妳英文咁叻，呢兩隻字點解呢？

　　蓉：等我睇睇先，嗯…「Respect」就係「尊重」，「Tolerate」就係「包容」。

　　珠：「尊重」？「包容」？即係點解呀？

　　炳：就好似火鍋嘅好朋友：餃子！餃子皮可以包容所有餡料，尊重唔同係口味！你鍾意食肉嘅，可以食羊肉餃，又可以食豬肉餃，豬肉配冬菇粒又得，韮菜又得，西洋菜都得！如果好似阿星食齋嘅，就用雲耳同粉絲。各適其色，各自各精彩！

　　珠：我知道喇！多謝姊姊，多謝爺爺！

　　陳太：（口音）蓉蓉，我什麼都不懂，妳可以幫珠女補習嗎？我俾返錢妳！

　　蓉：唔駛啦！珠女咁可愛，你哋又係Uncle Bing嘅朋友，free of charge！

　　陳太：（口音）飛…哦…夫…叉…儲…？

　　星：陳太，蓉蓉答應免費幫珠女補習！

　　陳生：多謝哂妳啊！我哋敬蓉蓉一杯！

　　炳、叉、蓉、星、陳太、陳生、司、叉爸：（一起舉杯）乾杯！

　　叉：（V.O.）根據蓉蓉「六度接觸」嘅理論，我今日重新認識陳家三口：陳先生、陳太太，同埋佢哋嘅可愛囡囡──珠女。估唔倒，我同蓉蓉錯綜複雜嘅關係，竟然因為珠女而改變，變得一發不可收拾……

　　﹝音樂過場﹞

　　Hanjin：公民教育委員會呼籲大家，

　　Fiona：尊重不同價值，

　　Hanjin：包容不同聲音。

　　﹝第三集完，待續。﹞