27、夫妻夜话 ...
-
诸人离开后，学礼开始张罗文强的晚饭，产后第二日可以进食稍稍固态的粥类，家里给她煲了燕窝粥同淮山鸡粥。
“头先大佬係咪话你啊？”文强靠坐在床上问道，医生检查过无碍，终于撤了心电监护以及导尿管，只需定时补液，今天她行动自如多了。
“冇啊，你惗多咗～”学礼将粥倒入碗内，还未待他放低保温壶，文强已伸手执过碗自己吃起来。
“你莫嚟啊，等我喂你喇！”学礼忙道。
“唔使喔，我边有咁娇弱～”文强端着碗细细嚼咽食物，忽得又皱了皱眉，“係了，你琴晚係咪瞓得唔好啊？”
“无呀……”看她独立进食确实无碍，学礼才坐低在床边椅子上，拿起自己的晚饭用起来。
“你唔使呃我喔，我转个身就睇到你喺床度郁，你仲唔係无瞓过？”听他否认，文强瞪了他一眼没好气道。
“唔係，我有瞓，净係嗰时咁啱醒返喈嘛。”学礼嘴里嚼着肉块，含糊不清辩解道。CID那边还没有什么进展，她那日坐上的出租车是被盗的，鉴证那边套到了一大堆指纹仲有排查，废车场夜麻麻又咁偏僻，目击证人一路未搵到，连报案人身份都成谜。重案组根据她的口供，正查紧她经手过的case里的可疑人物，一样需要时间。单是想到有人凭空要对她不利，他真就长夜漫漫无心睡眠。
“你唔好唔记得你自己都係病人，唔take care自己，底时手尾仲长有排跟喔……”文强撇撇嘴道。他要陪床她是阻止不了，可话嗮他都是伤员，整晚整晚不休息陪住她，她醒转他就在陪护床上假寐，又何必呢？她可不想底时她和bb出得院，他就倒下了。
“我有瞓，madam你放心。我讲咗了嘛，要听嗮你话嘅。你叫我瞓，我梗係有乖乖瞓了。”学礼笑笑，搬出结婚时的承诺来堵上她的抱怨。
“卖口乖~”文强偏了偏头嗔了他一句。
“係了，老婆，你话bb似你定似我啊？”上午医生才允许她下床，她就磨着自己去看了bb一次，下午午休过后又去了一次，看她目不转睛凝视bb的样子，他都要吃味了呢。虽然自己是她最亲密的人，可讲真，她望自己的眼神，都未曾似睇bb咁炽热过。
“我唔知喔，都睇唔出……”文强三两下将碗里的粥扒完，放低粥碗想了想道，“不过阿爸同阿哥头先都话佢似我喔~”
“係啊，都话个仔係似阿妈多啲，不过……”学礼咽下口中的菜心，凑近文强耳边故弄玄虚目光朝下坏笑道，“佢食饭嗰时好似我~”
文强才想辩bb咁细，边有正经食饭，早上给他喂奶，他都不过吃几口而已，后尾剩低的自己都用电动吸乳器排掉了。望望身边人意有所指的视线落处，忽得明白过来他在讲什么，她不由没好气地曲起手指重重敲了下他个死人头：“俞学礼你莫咁衰得唔得啊！”
“莫劳气莫劳气啊，因住伤口痛啊！”学礼忙好声好气地安抚横眉竖眼瞪视自己的产妇，又笑着给她倒了碗粥，“食多啲喇，你唔係应承咗你大佬听日要好好睇睇？”
“知了……”文强瞪了他一眼拖长声音道，嘟着个嘴端起碗自顾自食起来。
“哎，係咪仲嬲啊~係咪想我锡你啊？”学礼饮了几口自己的排骨汤，见她这样，不由起了玩心逗她。
“食嘢喇~”文强睨了他一眼顶了句。
“好喇好喇，係了，阿源佢哋话听日放假，佢哋嚟睇你喔~”学礼想起下午手足的来电，忙转告道。
“喔，慧慧what’s app 我知了。”文强抬头应了声。
“咁你今晚都要唞好啲，听日面色都好啲喇~”学礼夹了块牛肉大口咀嚼，叮嘱道。
“老婆，你以前都未同我讲过你都係早产儿……”去喂过bb晚餐又留了夜奶，护士帮文强清理完毕，学礼也冲过凉后，夜阑寂静，两人分躺于床上卧谈。
“乜呢啲嘢需要周围唱嘅咩？”文强自问这种话题真是好少会同人聊到，侧头望了他一眼，奇道。
“我唔係咁嘅意思……但係如果唔係阿爸讲起，我都唔知原来阿爸阿妈同你改呢个名係咁嘅缘故，佢哋先希望你健康强壮喈嘛。哎，讲真你真係好叻啊，体能可以操到咁fit~”学礼一样转头望了她道，朝她竖了个大拇指道。儿科那边儿子的情况一直都较为稳定，经过这两天一夜，文强情绪才终于平静下来，逐渐接受bb早产的事实，现下他只求她和孩子能平平安安住到出院就好。
“其实我细个阵好唔掂嘅啊，喺学堂俾男仔虾，大佬咪成日去学堂帮我出头。后尾佢话咁样唔得喔，咪逼我练体能，一大早嗌我起身跑步，周末又拉我去爬山游水，练得多，自然就fit咗咯，后尾咪冇男仔够胆虾我了。”文强靠着仰起的床面同他解释道，复又皱了皱眉撅了撅嘴，故作正经道，“唔係……后尾都仲係有男仔虾我……”
“嗯？边个咁唔知死，够胆虾你啊madam？”学礼瞪大眼追问道。
“听讲咪係阁下俞sir俞大少咯？”文强慢条斯理回道。
“係了係了，係我唔啱……”这记仇的小女人，学礼在心内默念了句，赔笑着下了自己的陪护床，侧身躺上文强的病床。
“喂，做乜喈？好逼啊！姑娘闹嘅啊！”文强往内侧移了移，不悦地嘟嚷道。
“我阵间就返过去。同你商量啲嘢嘛……后日你牛一，你惗住点过啊？”靠在大床上，学礼虚揽着她膊头问道，心想自己一早book咗的餐厅，她恨了好久但是怕孕期肠胃受刺激入冬后都没吃过的火焰冰淇淋，现下坐月都是不宜再食。虽然在医院庆祝生日是有好多不便，但多多少少总有些是自己可以满足她的吧。
“係喔，咁快就到了。”上礼拜在骨科病房他提起的时候，文强一心挂住他的检查结果，都是未有心思去盘算。点知自己今时今日会早产，和他一样被困在医院。望望他满怀笑意的期待眼神，文强抿了抿唇，若有所思道，“后日我哋去探bb嗰时，请姑娘帮我哋影返张全家福咪好咯~我哋一家人平平安安齐齐整整，对我嚟讲就係最好嘅礼物！”
“乜老婆你要求咁低嘅啊？”一早买定的礼物放在家里，产妇需要休息自然冇可能大搞party，算了，都是等她和孩子出院再补过了。学礼思索至此，拍拍她的右手背，道，“咁我吩咐陆姐煮碗寿面俾你喇~”忽得又想起什么，理了理她散落在颊边的发丝，学礼轻声覆于她耳边调笑，“係喔，bb都係人马座……睇嚟我呢一世要俾你哋两个人马座食住了。”
“做乜？你好唔忿气咩？唔忿气咪去搵第二个咯~”文强闻言转头娇嗔了他一句。
“我边够胆唔忿气啊~”学礼好笑地捏捏她下巴，凑过去轻轻吻了下她的唇，深情凝视她道，“老婆，我爱你！”
“哼~算你了！”文强好心情地笑着回吻了下，跟住道。
“你话bb改乜名好咧？”两人躺靠于一起，静了片刻，文强又开声道。
“俞苏？俞昇？俞诞？俞梓将？”学礼把玩着她的耳垂，随口道。
“乜人哋同你讲正经嘢啊！”文强没好气地拍了他胸口一下，之前两人是有聊过bb的名字，不过都是玩玩下，未料到bb咁快来报到，让两人措手不及。
“莫劳气喇！Mummy book咗玲玲师傅了，等bb同你出咗院，我哋带bb俾师傅睇过，改返个靓名好未？”学礼拍拍她面颊，好脾气道。
“之前mummy都冇话要俾师傅睇过先改名嘅，点解咁突然啊？”文强瞪大眼奇道。
“Mummy话你同bb今次大步揽过，多得祖先同菩萨保佑，梗係要俾师傅睇过，改个好名字保佑bb顺顺利利健健康康了。”学礼望住她解释道，“仲有啊，佢话听日日子唔错，要去大屿山嘅唐宁寺帮你同bb求平安符。”
“唔使去到大屿山咁远吧？咁冻嘅天仲舟车劳顿扑嚟扑去……”文强迟疑道。
“Mummy话嗰度嘅菩萨好灵嘅嘛，上次家姐出事，佢都係去嗰度求嘅平安符。”学礼揽揽她膊头安抚道，“由得佢喇，戥佢做返啲嘢安乐啲。”
“阿礼……其实……”文强皱了皱眉，不知要点开口。
“嗯？做乜？係咪边度唔舒服？刀口痛咩？”学礼见她不舒服的表情，心里忽得揪了一下，就要坐起身按铃，“我帮你叫医生……”
“唔係痛，唔使叫医生喇。”文强忙按住他抬高的手，望着他犹豫道，“我係想问……”
“想问乜？”学礼歪头探询，被她拉低的手又伸过去揉散她的眉心。
“我冇保护好bb，令到bb提早出世，daddy同mummy有冇嬲我啊？”文强看着他惴惴不安道。
“傻喇。我唔係讲咗了，根本都唔係你嘅错，应承我，唔准再乱惗嘢呐！”学礼又紧了紧搂着她的臂弯，温言开解她道，“你生咗bb落嚟，佢哋锡你都等唔切，点会嬲你啊？你唔知喔，我咁大个仔，都係头一次睇到daddy咁慈和，同对住我，天差地别喔~”
“你唔係同自己个仔呷醋噶？你啊，成日激daddy，佢梗係冇好面色俾你了~”文强白了他一眼，没好气道。
“哇，老婆你咁讲，宜家我好失礼你咩？你唔係有咗个仔就唔要老公喇？”学礼凑了个头过去故意道。
“係啊係啊，唔要你了。喂~你返过去瞓喇~”文强推了推身旁人。
“乖喇~我好规矩，唔会踢到你嘅，莫讲嘢了，夜了，瞓了~”学礼顺势揽住她，只手将被子往她颈下提了提，却没有起身的意思。
“喂！你咁赖猫嘅啊！”再推他都是照旧不起身，无几耐，文强便听到他渐沉的鼻息。
看看床同被子也都够宽，想想这几个月来他都好轻眠，前一晚他陪着自己又根本未休息好，望着他眼下淡淡的乌青眼圈，文强心内不由泛起阵阵心疼，便遂了他心意，由他虚搂着，无多久一样睡着了。
作者有话说
第27章 夫妻夜话
