《六度接觸》阿咩★

1、第一集

　　序幕
　　時：中午
　　地：舊區街上
　　人：蓉，星

　　（急速拖行李聲）

　　蓉：（大驚）Help！Help me！救命啊！救命啊！

　　星：（緊張，怕蓉行錯路）我警告妳！妳唔好走啊！

　　蓉：（V.O.）大家有冇聽過「六度分隔理論」？

　　「六度分隔理論」，英文就係「Six Degrees of Separation」，指世界上任何兩個人，只需要經過平均六個人嘅聯系，就可以拉上關係。

　　之但係，「六度分隔」太冰冷喇！我就鍾意用「六度接觸」，「Six Degrees of Contact」，去形容人與人之間嘅關係，你會唔會都覺得warm一啲、nice一啲呢？

　　星：（著急，見蓉準備轉入後巷）妳唔好再走啊！

　　蓉：（V.O.）雖然我依家very dangerous，俾一個烏卒卒嘅變態佬追咗幾條街，之但係，一切嘅問題，就係因為我唔認同佢嘅觀點，而佢又唔尊重我嘅角度。

　　星：（見蓉愈叫愈走，大喝一聲）妳同我企響度！

　　蓉：（V.O.）呢個故事，就係屬於你同我嘅故事──《六度接觸》……

　　﹝主題音樂﹞

　　第一幕

　　時：上午
　　地：機場／火鍋店（通電話）
　　人：蓉，炳

　　（炳手機響／老套的電話鈴聲。）

　　炳：（接聽，豪氣）炳記火鍋！

　　蓉：（扮恐怖聲）你估吓我係邊個？

　　炳：（笑，知道是蓉）小朋友！唔好玩電話呀！玩電話嘅小朋友，就會接受好嚴重嘅懲罰呀！

　　蓉：（繼續扮恐怖聲）乜嘢懲罰咁嚴重？

　　炳：（笑）就係今晚冇得食我！（豪氣）炳記！獨一無二，遠近馳名，天下無敵嘅麻辣火鍋！

　　蓉：（可愛，回復正常）唔好啊！Uncle Bing！我係為咗你個麻辣火鍋，先至返香港啊！

　　炳：（開心，笑）呵呵呵呵，蓉蓉，妳終於平安回家！

　　蓉：（可愛）係啊！我一落飛機，就即刻打電話俾你，（撒嬌）我係咪好乖呢？

　　炳：（笑）乖！蓉蓉最乖！就算妳全家移咗民去英國咁多年，都仲對我！（豪氣）炳記！咁有
　　心……

　　蓉：（可愛）唔止我有心！Mummy都好掛住Uncle Bing啊！佢託我帶咗好多英國手信俾你。

　　炳：（親切）妳拎住咁多行李，不如妳飛的士返黎啦！舅父唔單止請妳食火鍋，仲請妳搭的士！

　　蓉：（興奮）Thank you！Uncle Bing！

　　炳：（突然醒起）等等，我哋個舊區重建緊，好多地方有工程，火鍋店門口停唔倒車，嗯…（想了一想）妳仲記得妳細細個嗰陣，舅父陪妳打韆鞦嘅公園？

　　蓉：（自信）Of Course！嗰隻無用嘅叉燒包，就喺嗰度跌崩咗門牙……

　　炳：（講得詳細）嗯，過咗公園，妳叫司機大佬左轉，就會見到有一間白色外牆嘅學校，妳就喺嗰度落車啦！然後打電話俾舅父，等舅父出嚟接妳。明白唔明白？

　　蓉：（可愛）完全明白！No Problem！

　　炳：（親切）我準備好個炭爐，麻辣三寶，同埋妳最鍾意食嘅鵝腸，妳一返到嚟就有好嘢食！

　　蓉：（興奮）Uncle Bing！I love you！and your 麻辣火鍋！（fade out）

　　（音樂過場）

　　第二場

　　時：上午
　　地：的士
　　人：蓉蓉，司機

　　蓉：（V.O.）大家好，我係蓉蓉。

　　我喺小學六年級嘅時候，就同daddy Mummy一齊移民英國，經過咁多年，今日我終於可以返嚟香港，終於可以再食到Uncle Bing嘅麻辣火鍋喇！

　　有人話「外甥多似舅」，之但係，喺我嘅家族裡面，就係「外甥女多似舅」！成個family，就只有我同Uncle Bing鍾意食辣！所以我同Uncle Bing關係最好，以前一放假就會去Uncle Bing嘅「炳記火鍋」幫手……食！我真係可以一日三餐麻辣火鍋啊！我喺英國啲同學，見我無辣不歡，就幫我改咗個花名：Spicy Gril。

　　咦？咪住！點解個公園唔見咗既？仲有嗰檔雲吞麵呢？報紙檔呢？點解全部唔見哂嘅呢？

　　蓉：（疑惑）司機叔叔，你有冇行錯路啊？

　　司：（親切）小姐，我揸的士揸咗三十幾年，又點會行錯路呢？

　　蓉：（疑惑）如果你冇行錯路，咁你一定係兜路啦！

　　司：（苦笑）我作為一個敬業樂業嘅的士司機，又點會兜路咁卑鄙無恥呢？

　　蓉：（半信半疑）你冇兜路？我講得好清楚，係公園，可以打韆鞦嘅公園，並唔係呢個咁宏偉嘅體育館啊！

　　司：（無奈）小姐，舊區重建，就喺公園旁邊加建個體育館囉。

　　蓉：（懷疑）咁公園裡面啲韆鞦呢？點解唔見晒嘅？

　　司：（無奈）小姐，舊區重建，就係喺原先韆鞦嘅位置加建體育館囉。

　　蓉：（懷疑）算啦！司機，我係呢度落車！

　　司：（奇怪）咁快落車？仲未到學校喎……

　　蓉：（不想再理司機）OK啦！我喺呢度長大嘅，我認得路。（付款）呢度五百蚊，唔駛找喇！

　　司：（錯愕）吓？

　　（音樂過場）

　　第三場

　　時：中午
　　地：街上
　　人：蓉蓉，陳太

　　（拖行李聲）

　　蓉：（氣喘聲）咁耐仲未到嘅…（氣喘聲）一日最衰都係嗰個司機兜路！（氣喘聲）呢度又係邊
　　度？…（氣喘聲）點解一個人都冇嘅？……

　　蓉：（V.O.）咦？前面有個師奶啊！

　　蓉：（繼續氣喘，由遠而近）喂！…喂！…師奶…師奶…係啊…我…我叫你啊…（氣喘聲）

　　陳：（鄉音）哦～咩事？

　　蓉：（氣喘聲）請問…「炳記火鍋」係邊？

　　陳：（鄉音）餅記？

　　蓉：（漸大）我話係炳！記！火！鍋！

　　陳：（鄉音）餅記，我知道！往前行二百米，右轉，再行一百米。

　　蓉：（啼笑皆非）往前行二百米？右轉？再行一百米？

　　陳：（鄉音）米錯！往前行二百米，右轉，再行一百米。

　　蓉：（細聲，自言自語）二百米？…即係幾遠啊？可唔可以具體一啲啊？（沒好氣，對陳太）唔該晒妳，我自己想辦法搵搵啦！

　　（拖行李聲愈來愈遠…）

　　陳：（鄉音，從後叫蓉）姑娘，妳支住，往前行二百米，右轉，再行一百米。（fade out）

　　（音樂過場）

　　第四場

　　時：中午
　　地：舊區街上
　　人：蓉蓉，阿星

　　（繼續拖行李聲）

　　蓉：（V.O.）往前行二百米？右轉？再行一百米？Oh My God！點解我會蕩失路啊？

　　（地盤工程聲）

　　蓉：（V.O.）我唔單止蕩失路，點解會行入咗一個大地盤呢？

　　星（發現蓉，奇怪，近行她）小姐……

　　蓉：（V.O.）唔對路，嗰個烏卒卒嘅印巴藉地盤佬，點解眼甘甘咁望住我既呢？佢仲拎住大大個士巴拿，笑淫淫咁樣，向我行緊過黎啊！唔通…佢係變態嘅？

　　（急速拖行李聲）

　　蓉：（大驚）Help！Help me！救命啊！救命啊！

　　星：（緊張，怕蓉行錯路）我警告妳！妳唔好走啊！

　　蓉：（V.O.）奇怪，點解個變態佬嘅廣東話咁正嘅呢？（見星跑上她面前）弊！佢突然跑到我面前……

　　蓉：（大叫）變態佬啊！

　　星：（奇怪）變態佬？變態佬喺邊度啊？我唔見喎！

　　蓉：（發狂）變態佬係你啊！

　　（說罷，蓉拔腿就走，星呆了一會，立即追上去。）

　　（超急速的行李聲）

　　星：（著急，見蓉準備轉入後巷）妳唔好再走啊！

　　蓉：（V.O.）個變態佬係咁追住我，我完全唔知去咗邊度，突然見到前面有條後巷，立即走咗入去……

　　星：（見蓉愈叫愈走，大喝一聲）妳同我企響度！

　　蓉：（轉入後巷，撞到包，慘叫）哎呀！

　　叉：（誇張）姐姐仔，妳做乜行路唔帶眼呀？咦？妳好熟面口喎……

　　蓉：（V.O.）我同眼前嘅肥仔，最短嘅距離，只有0.01公分，我哋只係用咗唔夠１分鐘，就已經認出對方嘅身份……

　　叉：（驚喜）蓉蓉！？

　　蓉：（驚訝）叉燒飽！？

　　蓉：（V.O.）呢個故事，就係屬於叉燒飽同我蓉蓉嘅故事……

　　﹝音樂過場﹞

　　Hanjin：公民教育委員會呼籲大家，

　　Fiona：尊重不同價值，

　　Hanjin：包容不同聲音。

　　﹝第一集完，待續。﹞