96、你是我的眼（结局1 N）一个人的父亲节 ...
-
“老婆，咁夜先嚟探你，因为日头同daddy过父亲节喈。放心，头先出嚟之前我都打俾阿爸讲咗节日快乐，都同阿妈仲有大佬倾咗一阵，佢哋都几好，你唔使挂意了。”深夜，学礼放低花束在墓台前，跟住坐低。
“琴日心心又喺屋企提前同我做节，咁多年都係咁，不过今年你唔喺度，硬係觉得少咗啲乜。”学礼低头喉结蠕动几下，跟住抬头，坟场昏黄的灯光与眼帘前的水雾让墓碑上那帧至熟悉的笑脸在他视线中变得模糊，他含笑哽咽道，“心心真係大个女了，佢唔使笑姐帮手，静鸡鸡煮咗几味餸话同我庆祝喔~啲味虽然麻麻地，我都好满足了。老婆，你真係教得佢几好。惗返起以前我唔舍得俾佢学做家事，话嗮屋企有工人，等佢大个咗，我哋都唔会俾佢生活得辛苦。你就话，做人其实係冇保障嘅，我哋无可能一世睇住佢，学咗都冇坏嘅，宜家……你都算放心了。”
学礼又低了低头，努力眨眼不让泪水溢出眼眶，复道，“其实你话嘅无错呀，做人确实係冇保障嘅。我同你讲分手嗰次，你后尾俾返啲保单我，都係咁话。你仲讲你唔使其他嘢补数，净係要我唔好丢低你，你会惊，都会难过，因为乜都补唔返一个陪住你嘅生勾勾嘅人。我一路心痛一路又觉得你好傻，嗰时我哋都冇结婚，你咁样嗮自己青春同我一起，如果我……乜咗，你真係乜都冇噶。你份人就係咁，以前虽然拍拖，你都成日净係惊自己揾咗我乜着数。其实……我好愿意俾你揾着数嘅。同埋，我宜家先知有啲嘢真係冇得补数嘅，係你令到我做咗人爸爸，以前我都觉得你同我一起庆祝呢个节日，係理所当然嘅，但原来唔係。可能係我做人老公唔称职，个天要罚我，先……”学礼心痛得无法道出多一个字，皱着眉紧紧咬住下唇，闭上眼默默淌泪。
想起今晚到来的目的，学礼终是重又开声，“係了，今日除开係父亲节，都係我哋女女嘅预产期，记唔记得嗰时你话，如果个女今日或者过后出生，都算係你送我嘅节日礼物。我就话边有人咁赖猫嘅，啲礼物收嘅嗰个人都有份整，係咪悭咗啲啊。你就答我赖猫都係喺我度学返嚟嘅……”讲起她的顽皮旧事，学礼嘴角不自觉轻轻翘起，他无奈摇摇头，伸手抚上那张已不会给他再多回应的笑脸，请求道，“咁，赖猫嘅madam，俾我今晚喺度陪住你，就当係我陪你入产房了好唔好。心心係夜半出世，我惗细女都可能係。我唔赖猫了，我以后都唔赖猫了，我由你赖猫啊，你返嚟好唔好啊，我好挂住你啊……”学礼任由泪大颗大颗滚落到从今以后代替自己同她遮风挡雨的暗灰色石板上。
“早两日你先同我讲唔中意我喊，好，我唔喊，我笑啊，我笑俾你睇啊！”想起先前梦中她的话，学礼勉力平静下来，挤出笑脸，“我今日带咗朱古力，你至中意嘅榴莲夹心味，仲带咗蜜桃味嘅功能饮料，呢啲係心心端午节喺长洲户外教学带返嚟嘅钵仔糕同糯米糍，你睇下中意食乜了~唔紧要，慢慢嚟，我陪你……”将食物从纸袋里一一掏出逐样摆在墓碑前，学礼靠坐在墓碑旁，不再做声直至天光。
作者有话说
第96章 你是我的眼（结局1 N）一个人的父亲节
