《带我去巴黎呀》汤迪

2、第一章 第一章

　　第一章

　　一
　　阿汤本名汤凯。
　　阿汤清晰地记得，汤小开是四十七年前的9月11号，苏菲小嬢嬢送给他并正式向外人介绍他的称谓。
　　阿汤还清晰地记得，那年9月10号生日这天，老清老早被小嬢嬢从床上推醒。
　　“起来，穿衣裳，吃好早饭，我跟侬一道去学堂，侬覅进去，等了君王堂暗角里，我去寻倷班主任朱老师帮侬请病假，就讲侬身体勿适意。”
　　“为啥？”
　　“为啥？今朝是侬生日欸！等歇小嬢嬢帮侬请好假，带侬去南京路，侬先陪我到华安美发厅做头发，嗯，侬头发也长了，也要剪一剪，还要修修面，侬大概还勿晓得伐，男小囡第一趟修面叫啥？”
　　“叫啥？”
　　“叫开面！男小囡只有开过了面，绒毛刮清爽，再长出来的才叫胡子。从现在开始，小嬢嬢要每个号头去做趟头发，侬亦每个号头去刮趟胡子，特别是两边鬓角，多刮刮，刮好回来，用生姜擦一擦，慢慢就能长出喇耷胡子来了，有喇耷胡子的男人才最有腔调。”
　　“咦，我覅长喇耷胡子，像外国人。”
　　“我就要侬像外国人，最好像法国人，法国男人卖相好，最浪漫，女人顶顶欢喜。华安出来，小嬢嬢就带侬去培罗门买套西装行头，对，覅忘记，要带只大点的包，就拿那只Burberry，前两年抄家，还好被倷外婆拿伊装了重要物事囥到浦东屋里厢去了，否则现在覅晓得被哪里只畜生……”
　　“小嬢嬢，侬自家讲的，勿好骂人！”阿汤插进一句。
　　“我骂的是抄家的强盗胚！没只好东西，伊拉上辈子从动物园里逃出来，下辈子也只配再投胎回到西郊公园里去，赤膊赤屁股，天天被人家看洋相，被人家掇石头，吐馋唾水。哼！呸！”小嬢嬢气呼呼地冷哼一声，空吐一口，再继续。
　　“买好行头，当场换忒，旧衣裳换下来放了包里厢，就覅再转来了，往东穿过西藏路到先施百货，小嬢嬢再帮侬买双三接头皮鞋，配双黑袜子，穿皮鞋勿好穿白袜子，否则像十六铺上来的乡下人。中啷厢阿拉就俫沈大成吃长寿面，侬吃清炒鳝丝面，我叫份虾仁两面黄，分侬一半，另外我再加碗小馄饨。下半天阿拉去人民公园看花展，划船，白相到天暗了，就去过生日，去东海咖啡厅，吃罗宋汤、菲力牛排、奶油葡咕鸡，啧啧，囋。主菜吃好，再点只白脱蛋糕，小嬢嬢跟伊拉打声招呼，电灯关忒，蛋糕上十六根蜡烛点亮，推出来，唱机放Happy birthday，大家一道为侬拍手，一道唱，哪能？好伐？满意伐？开心伐？”
　　小嬢嬢一口气讲完安排，玉手捏牢阿汤面孔两颊的肉皮往两边拉开，前后扭了扭。
　　阿汤没开心，没表情，像木偶，直到小嬢嬢手放开，才晃动头颈左右摇了摇。
　　“摇头做啥？勿满意啊？吤么，过好生日，小嬢嬢再带侬去大光明看夜场电影，总可以了伐？”
　　阿汤还是摇摇头颈。
　　小嬢嬢眼睛睁到哋哩滚圆：侬还想哪能？勿见得，侬还要叫小嬢嬢帮侬寻…是勿是侬想叫倷班级里王咪咪一道……
　　“覅瞎讲！勿是呃！”阿汤面孔一红，眉头一皱，急吼吼打断，否认。
　　“咦，勿是喉咙嘎响做啥！勿是侬面孔红啥！当小嬢嬢勿晓得啊，前两天侬半夜里偷偷写……”
　　“小嬢嬢，今朝我勿好过生日！”阿汤急赤白咧地吼了一声。
　　小嬢嬢被阿汤的大声一吓，一抖。
　　阿汤干咽一口喉咙，放缓声音：这个辰光，我还过生日，勿大好伐？
　　“做啥？侬今朝十六岁了，男小囡过了十六岁生日就是男人了！哪能好勿过啊。”
　　小嬢嬢起身，往外走，拔高的声音随着下楼梯的脚步声一道传来。
　　“今朝我就要帮侬过生日！”

　　二
　　阿汤清晰地记得，生日当天他的生日没过成。
　　阿汤还清晰地记得，这天小嬢嬢准备的早饭是用熊猫牌炼乳冲出来的牛奶和在凯司令夹心面包上再涂了层肉糜并用植物黄油煎出来的土司。
　　吃好早饭的阿汤跟了小嬢嬢走出巴黎公寓，两人顺着重庆南路往北直走，走到淮海中路马路南面，阿汤习惯性地要去穿马路，被小嬢嬢一把拉牢。
　　“又忘记忒啦！”
　　阿汤顿了一顿，反应过来：哦，我一尕头侪是直穿过去嗬。
　　小嬢嬢不开心地白了阿汤一眼，往西横穿马路走向对面的妇女用品商店。
　　当年与重庆南路交汇的淮海中路北面不是像现在上有南北高架下有成都北路的十字路口，而是个丁字路口。淮国旧，也就是全称国营淮海旧货商店的门面就横了丁字路口的中央，红色大字的招牌十分醒目。
　　上世纪六七十年代，上海有多少家人家主动或被动拿屋里厢的红木家什、西洋钢琴、古董字画、金银首饰、钟表相机、狐毛貂皮、派克大衣，锅碗瓢盆、碗盏调羹等等，反正一切可以换成现金的物事皆送到里厢典当寄售或底价抛售来换取活命的口粮。此外，在样样侪要票证的计划经济年代，这里还有不需要凭票就可购买的海关罚没、出口转内销、过期等吃用物品，千样万样、琳琅满目。
　　直到今朝，有些还活在人世的老上海只要一提到淮国旧，就会懊闷痛，就会心滴血。在那场运动中，绝大多数有产阶级家庭皆受到冲击，多少心爱之物被各式各样的无产阶级造反派借以各式各样的革命名义抄走充公，其中被搬走的很大一部分又被这些专职或兼职的抄家队员偷偷摸摸搬进了这里。小嬢嬢六岁辰光她爸爸作为生日礼物送给她的一架德国斯坦威钢琴就经历了这样的命运，再也回不到她的身边。所以小嬢嬢每次经过这个路口皆要绕开了走。
　　过了马路，阿汤对小嬢嬢讲：过两年等我赚钞票了，我一分洋钿亦勿用，全部攒起来，攒够了，就帮小嬢嬢拿钢琴买回来。
　　小嬢嬢眼里泛起一丝绝望：还等侬买呀，老早没了。

　　阿汤立了瑞金一路和长乐路交汇处的君王堂教堂的围墙里望着一百米开外的向明中学校门，等帮他去学堂请假的小嬢嬢。街面上冷冷清清，差不多半个钟头，阿汤只看到一个拎着只菜篮子脚步蹒跚走三步停一步的阿婆，平时踏脚踏车下夜班经过这条路面的阿姨爷叔，还有两趟公交车一概不见，空气里一阵阵哀乐声从四面八方此起彼伏地飘来。
　　半个钟头后，小嬢嬢终于从校门里跑了出来，她面孔紧张又警惕地走两步回一趟头观察身后，等穿过马路到了阿汤面前，才松了口气并恶声恶气地讲：气煞我了！
　　“哪能啦？”阿汤问。
　　“我差点被倷教导主任当□□分子捉起来，还好，我之前是跟倷班主任朱老师讲侬昨日夜里吃夜饭吃坏肚皮了，亦就灵机一动装肚皮痛，躲到厕所间里蹲了老半天勿肯出来，否则现在肯定是被押到操场主席台上揪斗了。”
　　阿汤眨巴两下眼睛：为啥？
　　“为啥？我在教室门口跟倷班主任请假，伊随便哪能勿同意，伊讲悲痛的日节，工厂停工，学堂停课，就是路啷厢的公交电车，黄浦江上的轮渡亦侪勿开了，全国人民深切悼念领袖逝世，只要侬还有一口气，就算烂污厕了身啷厢，亦勿准请病假，必须到学堂里一道化悲痛为力量。我问伊，烂污厕了身啷厢，臭伐，全班同学一道闻臭味道啊。教室里倷班级同学听到，一道笑起来，大概声音忒响了，倷教导主任勿晓得从啥地方冲过来，瞪起牛眼睛，拍门骂人，门啷厢小窗的玻璃也被伊震落地上，粉粉碎。倷朱老师只好讲了原委，伊一把捉牢我肩胳，讲我是来诚心搞破坏，是现行□□，要召集全校师生开大会批斗我，还要押我去派出所坐牢监。”
　　“啊？结果侬哪能跑出来的？”
　　“是倷朱老师还算通人性，伊看我老半天轧（ yà：躲）了厕所间勿出来，以为我没带草纸，就送进来，偷偷跟我讲，教导主任去寻校长了，叫我快点跑，但讲好必须要侬快点去学堂。”
　　阿汤拔腿就要跑，被小嬢嬢一把拖牢。
　　“覅急呀，侬现在就进去，勿是穿帮了嘛，等歇，过半个钟头。”

　　夜里六点钟，阿汤回到巴黎公寓，一进门便看到小嬢嬢在客堂间踏缝纫机。
　　小嬢嬢停下，几个问号急切抛出：侬哪能现在才回来啊？没出啥事体伐？倷教导主任有否有寻侬齁势？”
　　阿汤轻松地：我没事体，倒是朱老师跟全班同学留下来写检查，我陪了伊拉全部写好，通过，大家侪一道被允许出教室。
　　“伊拉为啥要写检查？”
　　“悲痛的日节，大家笑了呀。”
　　小嬢嬢松口气：哦，我还一直担心侬有麻烦，还到倷学堂去看过，门卫勿让我进去。侬没穿帮伐？
　　阿汤摇摇头：没，我按侬讲的，每过半个钟头举一趟手上厕所，中啷厢朱老师跑去医务室帮我拿来了食母生，黄连素，我假装吃忒，下半日又举了两趟手。缝纫机啥地方来的？
　　“问5号里周家姆妈借的。我一尕头去南京路兜过了，一路兜到外滩，再从金陵东路兜回来，转到淮海路，所有商店侪勿营业，啥物事亦买勿着，勿晓得几辰光才会恢复正常。回到屋里，我翻了翻，嘿嘿，居然给我翻出一块华达呢，我就拿了侬的衣裳去寻周家姆妈，按了侬的尺寸，叫伊帮忙裁好，反正我亦会踏缝纫机，就勿麻烦伊了，借了回来自家踏。出来正好碰到9号吴太太跟12号里的大阿姐，伊拉听讲侬今朝生日，我没帮侬买到新衣裳新皮鞋，两尕头一个回去拿了双伊拉儿子没穿过的新皮鞋，一个拿来了伊先生一件新白衬衫跟一根领带，我要把伊拉钞票，随便哪能勿肯收，还讲今朝来勿及了，干脆明朝礼拜六，吃好中饭，下半天三点钟叫上52号李太太跟伊拉大女儿，27号里的张老师跟伊拉小儿子，大家一道为侬补过生日，开Party。对，侬要勿要叫上侬同学王咪咪？”
　　“覅叫王咪咪，我覅伊来。
　　“为啥？侬勿是……”
　　“啊呀，伊要来了，下个礼拜一，全班同学，还有朱老师，勿侪晓得我没肚皮撒！写检查是因为我引起的，大家晓得了真相勿恨死我啊！再传到教导主任跟校长耳朵里，侬没被揪斗，我要被揪斗了。”阿汤打断。
　　“对对对，人勿好太多，太多了穿帮，特别是跟侬一个学堂的。对了，吴太太还讲，伊会做蛋糕，面粉、牛奶、鸡蛋、色拉油样样有，伊亲自帮侬做只生日蛋糕。唯一的就是缺小蜡烛，屋里厢红蜡烛倒是还有几根，但是上坟用的，勿吉利。后来我想到31号里的老克勒，伊有两根电蜡烛，还有一串像星星一样闪发闪发的小灯泡，我就跑去邀请伊明朝亦来，顺便问你借来用用，伊答应到辰光带过来。囋，气氛，情调，侪有了。”
　　“小嬢嬢，覅搞了嘎隆重，今朝夜饭就吃碗卷子面算了。”
　　“勿来噻，我跟侬讲过了，男小囡十六岁生日是一生一世最重要的日节，必须隆重！再讲了，大家一道帮侬过生日，是，是心里，开心！吴太太跟老克勒侪讲，交关辰光没开心过了！”

　　三
　　阿汤清晰地记得，他十六岁生日这天夜里，小嬢嬢整夜皆在帮他赶制人生的第一套西装，在灯光下做生活的小嬢嬢是那么认真，那么的像天底下的慈母。
　　阿汤还清晰地记得，这天夜里，他坐在小嬢嬢身边看书，有一句没一句的讲闲话，到了平时该上床的十点半，小嬢嬢讲：侬好上去汰脚困觉了。
　　“覅，我陪侬。”
　　“我还要有一歇了，去困，听闲话。”
　　“我就覅。侬自家讲的，过了今朝我就是男人了，我要等到十二点钟钟敲过，倒要看看男人跟男小囡有啥区别。”
　　小嬢嬢斜睨了阿汤一眼，笑了起来。
　　“侬笑啥啦？覅笑，要么侬来告诉我，有啥区别。”阿汤放下书。
　　小嬢嬢摇摇头：我勿讲，侬自家体会。
　　“讲呀！讲勿讲？勿讲，我攉侬痒兮兮！”
　　阿汤作势的手爪还没碰到小嬢嬢的腰，小嬢嬢已花枝乱颤，浑身抽筋，举手投降，口中连连求饶：覅覅覅覅覅！覅碰我！救命啊！
　　“我手还碰到侬嘞，侬就瞎叫！”
　　“我最怕痒了！我最吓人家攉我痒兮兮！手拿开！”
　　“讲！勿讲我真来咾！”
　　“我讲，我讲。成为男人的第一标志，就是勿会欺负女人！手快点放下去！”
　　阿汤撇撇嘴角，手放了下去：第二呐？
　　小嬢嬢去踏缝纫机，边做生活边讲：第二，是要拼了命也要去保护好自家的女人，哪怕流血受伤，甚至眼皮眨亦勿眨地肯为伊去死！
　　阿汤眼睛定住，控制住眼皮眨动，认真地：小嬢嬢，对过复兴公园里厢有个打拳的爷叔吓（hè：很）结棍，伊一掌可以劈碎十块红砖头，一脚可以踢得碗口粗的树摆动，我想正式拜伊为师傅。
　　“啥叫正式？”小嬢嬢停了踩踏，警觉地盯牢阿汤眼睛。
　　阿汤亦不回避，坦然回答：哦，我勿是每个礼拜天早啷厢进公园跑步嘛，侪会碰到伊，有辰光我就立了旁边看，有辰光伊打套路，我就跟了学，伊从来勿赶我走，我想只要我开口跟伊讲想做伊徒弟，伊肯定会答应的。
　　小嬢嬢收回视线，又去做生活，讲：不是会打相打的才叫男人。
　　“万一碰到事体，人家先动手，勿会打相打，勿是要吃亏？！”
　　小嬢嬢摇摇头：勿对。
　　“有啥勿对？我老早想好了，这辈子我要保护侬，再亦勿让侬被人家欺负。”阿汤语气坚定，一脸严肃。
　　小嬢嬢被戳到痛处，手脚停下来，闭上眼睛，身体微微发抖，牙齿咬牢下嘴唇皮，眼泪水悄然滑出眼眶。
　　阿汤语气更加坚定，举手发誓：小嬢嬢，我发誓，等我练好功夫，我就去寻那个欺负过侬的人，我要打得伊……
　　“覅讲了！”小嬢嬢厉声阻止。
　　阿汤一吓，收住了口。
　　小嬢嬢吸了下鼻子，睁开眼睛，一把抹去眼泪，遂长长吐了口气，缓下缓，淡淡地讲：过去的事体，过去了。
　　“勿可能！”阿汤咬牙切齿。
　　小嬢嬢伸出右手，拍拍阿汤的面颊，语气温和地转换话题：侬想拜师傅锻炼身体，小嬢嬢不反对，但为了打人，终归勿对的。
　　小嬢嬢刚讲完这句，“铛，铛，铛……”墙面上的三五牌挂钟敲响。
　　“好了，十一点钟了，小嬢嬢承认侬已经提前是男人了，勿需要再等到十二点钟，上楼去房间里困觉。”
　　阿汤不肯：侬几点钟结束，我几点钟困。
　　“勿来噻，侬现在正在长发头上，按时困觉顶顶重要。”
　　阿汤还是坚持：就不困！
　　“覅耍赖皮！侬还想勿想当男人啦，优秀的男人最重要的标准，就是要听女人闲话，晓得伐！”
　　“那我隑（gāi，倚靠）了侬背脊啷眼睛闭忒歇，等侬好了，一道困，好伐？”
　　小嬢嬢又伸手，中指搭在食指上，在阿汤的额头上弹了一记麻栗子：侬看，刚一歇歇，又像个小人了。好，隑忒一歇，我好了叫醒侬。
　　阿汤移了凳子到小嬢嬢身后，从背后环抱住她的腰，将头倚靠在她的背上。
　　小嬢嬢的腰肢丰腴温暖，小嬢嬢的心跳平缓安宁，小嬢嬢背上久违的像妈妈的味道那样的香气一阵阵传进阿汤的鼻头里，阿汤的呼吸就随着小嬢嬢的心跳节律和沁人的香味一歙一扇，没过一会眼皮耷牢，沉沉睡去。