6、闺蜜倾偈 ...
-
盯着转职报告许久，似要望穿纸面，文强最终落笔在页面下端签上自己的名字。值得吗？她没有答案，人生本来就是一场冒险，从预感它可能存在的那刻起，大概就没有办法抗拒它吧。虽然自己一开始就无意让它存在，但药物和母体的疲劳都未让它离去，试问，她又如何狠得下心去割舍那小小的生命？赌学礼会对自己好，赌他日有机会返operation team？顺其自然吧，今日唔知听日事，就似毕业那晚她估唔到自己留喺operation team的日子原来只得咁短，与其忧愁将来，不如把握当下吧。虽然没心理准备咁早做人妈咪，但如学礼所言，还有八个月时间俾两人去学习。有心，相信会有个好结果咯。
做回久违的文职，文强依然得心应手。除开看过报告的展sir和潘sir，以及知悉内情的俞sir，面对班手足疑惑的目光，她都未有详细解释转职的原因。
在B team做咗一排second IC，bob仔都愈发明了身为team leader的不易，B team去了SAS，他就转回A team顶上他条女的缺，亦愈发用心训练。不过happy hour他就出现得少，放工后常常带着madam So一起失踪。偶尔落吧，都时不时看表早早返屋企交人。想想从前热恋期的庄sir，班手足亦是眉眼挑通，笑归笑，其实心里不免多多少少都有些羡慕吧。
大概bb是有心嘅，等父母发现自己存在以后先来发作。之前两个月文强大都睡得几安稳，这几日，她却日日清晨都要被腹中汹涌的呕意唤醒。
“点嘛？”学礼揸了杯温水站在她身边，看她吐过又冲完脸，才递了过去，关切道。
文强摇摇头不欲讲嘢，只徐徐饮落小半杯水，再将杯子俾返学礼。
“时间仲早，瞓多阵了。”学礼轻揽住她后背，一同往卧室走去。出院前他陪文强去妇产科医生处做了第一次产检，也初初明了现下这个阶段她可能会有的症状。可从识得她以来，她向来都是标准的健康宝宝，连病都生得少。讲真，自己都不甚习惯如今状况百出的她。初时见她晨呕，他险些又拉她上医院，她只皱眉摇摇头说这是正常现象，不似她读书时在产科流转见到的一日照三餐呕的大肚婆，腹中的bb已经足够体贴了。远的不说，那年见辉嫂陀第二个女，都是顺顺利利生下个b，学礼第一次知晓，看似理所当然的孕期，原来竟如此不易。虽然自己日日陪住她，但都不见她胖起来，他真是好担心有乜唔妥。但她就说产检结果正常就好，孕前期体重本就未必会有多大变化，她自己心中有数。虽然两个人住在一起，但他有时都会有种自己是局外人的感觉。她坚持要到满三个月后方同家人说，他亦不敢忤逆，费事激到她情绪不稳，唯有悄悄同阿Nick多取经，亦请他守住口风。
进入孕期第四个月，扰人的朝早孕吐终于告一段落。学礼告知屋企文强有孕的事，也讲明两人可能暂时不会结婚，虽然屋企人并不多赞同，可是讲到尾结婚终究是当事人的事，他们竟也无法插手。只得着学礼好好照料文强，多带她返大宅食饭，并着司机多送些汤水过来，又book定月嫂同私家医院。
文强本就不胖，8月单薄的夏装亦难遮掩她逐渐显露的小腹，眼尖的手足渐渐看出端倪。两人商量过后，都是学了妈打，趁在展sir家打边炉时派了朱古力同曲奇饼俾班手足。
“哇，恭喜阿礼恭喜madam~”
“恭喜恭喜！”
收到礼包，班手足都纷纷向两人道贺，跟住不免问道几时办喜事。
“迟啲咯~仲惗紧……”文强扒着碗中学礼给她盛的鱼片，是这么答的。
“反正唔会少了你哋这餐嘅~”帮大肚婆烫着她至爱的鱼片的俞sir，是这么答的。
克服了开唔到枪的心理障碍重回SDU的庄sir是晚就将这喜讯带给因为当更去唔到阿头屋企的未来庄太，day off时未来庄太便约了文强出嚟小坐饮嘢。
“喂，发生咁大件事都唔讲，係咪当我好姊妹先？”看俞sir安顿好他个b同b嘅阿妈二位一体的母子俩，又叮嘱个阿妈走时call他，先同慧慧笑笑离场，未来庄太问坐于自己对面尝着榴莲炖奶的那个大肚婆。
“咁唔係都话未满三个月唔讲得，唔係嘅话bb会小气嘅嘛~再讲宜家你哋都知喇！”文强挑挑眉道。
“点嘛，係咪好辛苦啊？”大热天行beat成日身水身汗的慧慧，看着初初显怀的文强，关心道。
“Ok喇，早排吐得好犀利，呢啲嘢全部唔饮得~”文强指指桌前的甜品，吐了吐舌。
“唔怪得之睇你都冇肥到……”慧慧理解地点点头，跟住指指她未着一物的手指又开声，“你哋……真係冇打算结婚？定係阿礼冇惗住同你结婚？”看学礼刚才送她过来周到的样子，又不觉他是这种人啊。
“都唔係，佢有问过，但係……”文强皱了皱眉，摆低勺子拱起双手于枱面，咬了咬唇方道，“慧慧，其实我一路都无惗过咁早结婚同埋生BB，就算同阿礼行埋一起之后，我都以为就算要结婚，都会拍咗好耐嘅拖先结。就算要生b，都係等我喺operation team做满合约期之后。今次咁突然转职，虽然展sir同潘sir冇留难我，但我都知其实佢哋对我好失望，我自己都係。但係，要我落咗个b，我又真係做唔到喔。嗰日我喺总部晕低咗俾阿礼送到医院，佢先知我有咗。其实嗰日朝早我喺屋企已经check咗，我原本惗住去医院确实个结果，先同佢摊牌，但佢都早过我预料嘅知，跟住佢又哀我留低个bb，又同我求婚。虽然佢之前都话过结婚嘅嘢，我当佢讲笑嘅喈。佢同我求婚嗰刻，我真係分唔到，佢係因为中意我先同我求婚，定係因为个bb先同我求婚，我唔想我嘅婚姻係因为个bb先得返嚟，我都唔想佢因为想孭住个责任先夹硬要娶我。所以我都冇应承，佢后尾都冇再提了。”
“咁……你哋惗住点啊，就一路唔结婚？你宜家四个月，再过半年bb就出世了喔……话快都好快嘅喈。如果唔快啲决定，我惗对bb都唔係几好嘅喈……”慧慧想了想道。
“我知啊，就係咁我先烦。我都唔想bb底时出世，发现佢嘅屋企同其他人嘅唔同，但係我真係唔知用点样嘅身份去接受阿礼，究竟佢净係我bb嘅爸爸，定係同时都係我愿意嫁嘅嗰个男人。”文强烦躁地拨了拨刘海道。
“点解我觉得你惗嘅好复杂？你哋行埋一起咁耐，我以为你哋已经好信任对方。我係觉得，起码阿礼肯负责都唔会係坏事啊。其实，你愿意为咗同佢嘅bb转返文职，我觉得你心入面已经俾到答案了。”慧慧轻轻拍了拍她的手臂劝解。
“係咩？”文强怔了怔，“但係我唔知我係咪真嘅了解佢，之前因为tiger哥嗰单case，仲有好多事，我同佢嗌过交，我先发觉得以前认识嘅佢，都净係好表面。我知佢宜家对我好好，但我分唔到佢係因为bb先咁对我，定係因为真係中意我。”
“我听阿源讲，佢之前有机会去英国受训仲有可能见board喔，係咪因为你先无去到嘅？”慧慧想起之前阿源刚回SDU嗰时同她讲过的旧事，迟疑了下，终是续道。
“我都唔知係因为我定係因为个bb啊……慧慧，如果俾咗你係我，你会点拣？”文强似是抓住了根救命稻草，迷惘地抛出问题。
“阿强，其实我觉得，有嘅嘢，係冇得分到咁清楚嘅，尤其係感情嘅嘢，好多时候，心比脑行得快。以前我同阿韬一起，有时我知佢烦紧啲工作上嘅嘢，但係佢从来唔同我讲，我都会好烦，我会好想知佢烦啲乜，但佢一次两次都係咁，我最尾都放弃咗。我嗰时真係以为我好中意阿韬。后尾我同阿源一起咗，上次tiger哥件事，佢都係一样收埋自己，但我点都放弃唔到，我净係知就算佢乜都唔讲住，我都係要陪佢撑落去。”慧慧顿了顿，跟住道，“我听阿源讲，你考飞虎，阿礼帮咗你好多。我都会惗起以前阿源帮咗阿韬嚟追我，我觉得男仔唔会咁俾心机去对一个普通女仔，我係觉得阿礼对你係认真嘅。其实从普通朋友到男女朋友，甚至到未婚夫妻，我觉得係有好大唔同嘅。之前我都係当阿源係姊妹，好多冇得同阿韬讲嘅嘢，我会同佢讲。后尾我哋行埋一起，我都唔多唔少会发觉佢有以前我唔熟悉嘅一面，但我觉得中意一个人，呢啲嘢係可以接受到嘅。跟住佢同我求婚，后面又发生tiger哥件事，佢又开唔到枪，我发觉人生真係好无常，但我都觉得自己係可以陪佢撑落去，我唔舍得睇佢低落咗，跟住怀疑自己。我觉得喺呢个过程入面，我对自己嘅认识，对佢嘅认识，都去到一个唔同嘅阶段。”慧慧说着拉住了文强的手，“你哋突然面对bb嘅事，一时之间唔知点算，都好正常。如果唔係中意你，我惗阿礼都唔会咁着紧你哋嘅bb。如果你一定要阿礼俾到一个答案你，如果我係佢，我都会觉得好难回答，事关你同bb宜家係二位一体嘅。佢对你好，係关心你，都係关心你哋嘅bb。因为bb喺你身度，佢除开对你哋好，根本都冇其他方式可以表达。两个人行埋一起，其实係需要好大嘅运气，你哋宜家仲有埋bb，或者係个天，又或係个bb，希望你哋认清楚自己嘅心，冇因为嗌交疏远咗，怀疑彼此，先拉埋你哋一起。你哋要珍惜喇~我好希望我同阿源结婚嗰时，至少你哋都因为件事有咗个共识。你睇你宜家愁眉不展，bb知道都会唔开心嘅……”
“係咩？”文强一脑门子浆糊，看看慧慧手上的订婚戒指，若有所思。
作者有话说
第6章 闺蜜倾偈
